बारामती : न्यूज कट्टा
बारामती शहरातील बेकायदेशीर अकॅडमींना बारामती नगरपरिषदेच्या अग्निशमन विभागाने ‘फायर एनओसी’ दिल्याच्या प्रकरणाची गंभीर दखल नगरविकास विभागाने घेतली आहे. याबाबत मोहसीन पठाण यांनी केलेल्या तक्रारीनंतर हे प्रकरण नगरविकास विभागाच्या उपसचिवांकडे पाठवण्यात आले आहे. त्यामुळे येणाऱ्या काळात वरिष्ठ पातळीवरून या प्रकरणाची चौकशी होण्याची शक्यता आहे. दरम्यान, संबंधित अधिकाऱ्यांच्या निलंबनाच्या मागणीसाठी मोहसीन पठाण हे उद्यापासून बारामती नगरपरिषदेसमोर उपोषण करणार आहेत.
बारामती शहरातील बेकायदेशीर अकॅडमींना प्रशासनातील अधिकारीच सहकार्य करत असल्याची बाब आता लपलेली नाही. अशातच मागील वर्षी राष्ट्रवादीचे कार्यकर्ते मोहसीन पठाण यांनी केलेल्या आंदोलनानंतर फायर ऑडिट नसलेल्या अकॅडमी बंद करण्याचा निर्णय घेण्यात आला होता. प्रत्यक्षात अशी कोणतीही कार्यवाही नगरपरिषद प्रशासनाने केली नाही. उलट अग्निशमन विभागाकडून या अकॅडमींना बेकायदेशीरपणे फायर एनओसी दिल्याचा प्रकार उघड झाला आहे. वास्तविक,फायर एनओसी देण्यासाठी काही नियम आहेत. तात्पुरती एनओसी देतानाही काही नियमांचे पालन होणे आवश्यक आहे. मात्र केवळ आर्थिक फायद्यासाठी या नियमांची पायमल्ली केली जात असल्याचा आरोप मोहसीन पठाण यांनी केला आहे.
मोहसीन पठाण यांनी माहिती अधिकार कायद्याअंतर्गत शहरातील अकॅडमींना दिलेल्या फायर एनओसी संदर्भातील कागदपत्रांची मागणी बारामती नगरपरिषदेच्या अग्निशमन विभागाकडे केली होती. मात्र आजवर ही कागदपत्रे दिलीच नसल्याचे पठाण यांनी सांगितले. त्यामुळेच आपण राज्याच्या मुख्यमंत्र्यांकडे याबाबत तक्रार दाखल केली. त्यावर आता नगरविकास विभागाने या प्रकरणाची गंभीर दखल घेत उपसचिवांकडे हे प्रकरण सोपवले आहे. त्यामुळे लवकरच या प्रकरणाशी संबंधित अधिकाऱ्यांची चौकशी होण्याची शक्यता असल्याचेही पठाण यांनी नमूद केले.
अधिकाऱ्यांच्या निलंबनासाठी उपोषण
दरम्यान, काहीतरी काळेबेरे असल्याशिवाय संबंधित विभागाकडून ही कागदपत्रे देण्यास टाळाटाळ केली जात नाही. त्यामुळेच आता संबंधित अधिकाऱ्यांच्या निलंबनाच्या मागणीसाठी मोहसीन पठाण यांनी उद्या गुरुवार दि. ११ जुलै रोजी बारामती नगरपरिषदेसमोर उपोषण करण्याचा निर्णय घेतला आहे. त्यामुळे आता प्रशासन या प्रकरणात काय भूमिका घेणार याकडेच सर्वांचे लक्ष लागले आहे.
