बारामती : न्यूज कट्टा
आपल्या आजीसोबत घरी जात असताना एका मालवाहतूक रिक्षाने दिलेल्या धडकेत एका पाच वर्षांच्या चिमुकल्याचा मृत्यू झाल्याची घटना बारामती शहरानजीक असलेल्या गुणवडी येथे शुक्रवारी दुपारी ३ वाजण्याच्या सुमारास घडली. या घटनेप्रकरणी बारामती शहर पोलिसांनी रिक्षा चालकावर गुन्हा दाखल केला आहे.
अथर्व अभिजीत लोढे (वय ५, रा. गुणवडी, बारामती) असं या अपघातात मृत पावलेल्या बालकाचं नाव आहे. याबाबत मिळालेली माहिती अशी की, काल दुपारी अथर्व हा आपल्या आजी सुरेखा अनिल लोंढे यांच्यासमवेत गुणवडी गावातील मुख्य रस्त्ता ओलांडून घराकडे जात होता. त्यावेळी डोर्लेवाडीकडे निघालेल्या मालवाहतूक रिक्षाने (क्र. एमएच ४२ एम ४२०२) या दोघांनाही जोराची धडक दिली. या धडकेत अथर्वचा मृत्यू झाला. तर त्याची आजी जखमी झाली आहे.
या प्रकरणी बारामती शहर पोलिसांनी रिक्षाचालक संदीप बाळासो भागवत (रा. डोर्लेवाडी, ता. बारामती) याच्यावर गुन्हा दाखल केला आहे. दरम्यान, काही दिवसांपूर्वी बारामती शहरात झालेल्या अपघातात एकाच कुटुंबातील तिघांचा दुर्दैवी मृत्यू झाला होता. त्यानंतर गुणवडी येथे काल झालेल्या अपघातात निष्पाप बालकाचा मृत्यू झाल्यामुळे हळहळ व्यक्त होत आहे.
