बारामती : न्यूज कट्टा
बारामती शहरातील जळोची येथे एका व्यक्तीवर कोयत्याने वार करत त्याला जीवे मारण्याचा प्रयत्न करणाऱ्या दोन आरोपींना पुणे ग्रामीण पोलिसांच्या स्थानिक गुन्हे शाखा आणि बारामती तालुका पोलिसांनी अहिल्यानगर जिल्ह्यातील रुई छत्तीसी येथून अटक केली आहे. आम्ही इथले भाई आहोत असं सांगत त्यांनी एकावर कोयत्याने हल्ला केला होता. त्यानंतर परिसरात एकच खळबळ उडाली होती.
दि. ९ ऑक्टोबर रोजी रात्री नऊ वाजण्याच्या सुमारास फिर्यादी जळोची येथील एका पान शॉपवर थांबले असताना आरोपी जयेश बाबासाहेब माने (वय २०), प्रथमेश बाळू गवळी (वय २०), विनोद गणेश जाधव (रा. तांदुळवाडी, बारामती) आणि इतर चार अनोळखी इसमांनी “तु गणेश वाघमोडे याच्यासोबत का फिरतोस? माझी माफी माग!” असं म्हणत शिवीगाळ केली. त्यावेळी प्रथमेश गवळी याने “याला ठेवायचे नाही” असे म्हणत त्याच्याजवळील कोयत्याने फिर्यादीवर जीवे मारण्याचा प्रयत्न केला. त्यानंतर आरोपींनी “आम्ही इथले भाई आहोत” असे म्हणत कोयता हवेत फिरवत घटनास्थळावरून पसार झाले.
या घटनेनंतर पोलिस अधीक्षक संदीपसिंह गिल यांनी आरोपींना तातडीने अटक करण्याच्या सूचना दिल्या होत्या. त्यानुसार स्थानिक गुन्हे शाखेचे पोलीस निरीक्षक अविनाश शिळीमकर आणि बारामती तालुका पोलीस ठाण्याचे पोलीस निरीक्षक चंद्रशेखर यादव यांच्या मार्गदर्शनाखाली विशेष तपास पथक तयार करण्यात आले. त्यांनी या घटनेचा तपास सुरू केल्यानंतर गुप्त बातमीदारामार्फत आरोपी अहिल्यानगर जिल्ह्यातील रुई छत्तीसी येथे असल्याची माहिती मिळाली. पोलिसांनी शिताफिने कारवाई करत या दोन आरोपींना अटक केली आहे.
यातील आरोपी जयेश माने याने बारामती शहरामध्ये साथीदारांसह गेल्या वर्षी खून केलेला आहे. याच गुन्ह्यात तो तुरुंगात होता. दीड महिन्यांपूर्वीच त्याची तुरुंगातून सुटका झाली आहे. या दोन्ही बाजूच्या आरोपींचा जुलै २०२३ मध्येही वाद झाला होता. त्यावेळी जयेश माने याला मारहाण करण्यात आली होती. त्याच्या फिर्यादीवरून गणेश वाघमोडे, गौरव सूळ व इतरांवर जीवे मारण्याचा प्रयत्न करण्याबाबत गुन्हा दाखल करण्यात आला होता. त्यानंतर आता जयेश व त्याच्या साथीदारांनी जळोची परिसरात एकावर जीवघेणा हल्ला केला.
पोलिस अधीक्षक संदीपसिंह गिल, अपर पोलीस अधीक्षक गणेश बिरादार, उपविभागीय पोलीस अधिकारी सुर्दशन राठोड, स्थानिक गुन्हे शाखेचे पोलीस निरीक्षक अविनाश शिळीमकर यांच्या मार्गदर्शनाखाली पोलीस निरीक्षक चंद्रशेखर यादव, सहाय्यक पोलीस निरीक्षक विक्रम पवार, पोलीस उपनिरीक्षक अमोल कदम, ग्रेड पोलीस उपनिरीक्षक बाळासाहेब कारंडे, सहा. फौजदार एस. जे. वाघ, पो. हवा. खारतोडे, पो. हवा. स्वप्नील अहिवळे, स्था. गु. शाखा पुणे ग्रामीण पो. शि. होळंबे, शकील शेख यांनी ही कारवाई केली.
