बारामती : न्यूज कट्टा
बारामती तालुका पोलिस ठाण्यात बारामती एमआयडीसी परिसरातील उद्योजकांची नुकतीच बैठक घेण्यात आली. सव्वा दोन तास झालेल्या या बैठकीत पोलिसांनी आणि एमआयडीसी प्रशासनाने औद्योगिक क्षेत्रातील विविध समस्यांवर चर्चा करत त्यावर उपाययोजना करण्याचे आश्वासन देण्यात आले आहे. एमआयडिसीतील व्यावसायिकांना जबरदस्तीने पैसे मागितल्यास खंडणीचे गुन्हे दाखल करण्याचा इशाराही पोलिस यंत्रणेकडून यावेळी देण्यात आला.
उपजिल्हाधिकारी तथा एमआयडीसीचे प्रादेशिक अधिकारी हनुमंत पाटील आणि पोलीस निरीक्षक चंद्रशेखर यादव यांनी बारामतीकरांच्या मूळ प्रश्नांना हात घातला आहे. केवळ कायदा-सुव्यवस्था नव्हे, तर औद्योगिक परिसरातील उद्योजकांच्या सुरक्षेचाही प्रश्न गांभीर्याने घेतला आहे. प्रादेशिक अधिकारी हनुमंत पाटील, एमआयडीसीतील उद्योजक संघटनांचे प्रतिनिधी व सदस्य उपस्थित होते. या बैठकीत एमआयडीसी परिसरातील वाहतूक नियोजन, सीसीटीव्ही कॅमेरे बसवणे, अवैध धंदे, रस्त्यावर होणारे पार्किंग आणि व्यवसायिकांना होणाऱ्या त्रासाबाबत आणि एमआयडीसी परिसरात काम करणाऱ्या महिला कामगार यांच्या सुरक्षिततेबाबत सविस्तर चर्चा झाली.
उद्योजकांकडून जबरदस्तीने पैसे किंवा कोणत्याही प्रकारची मागणी करणाऱ्यांविरुद्ध थेट खंडणीचे गुन्हे दाखल केले जातील असा स्पष्ट इशारा पोलिस निरीक्षक यादव यांनी दिला. तसेच, वाद निर्माण करणाऱ्या परप्रांतीयांवरही कारवाई करण्यात आली असून, एकाच्या ताब्यातून तलवार जप्त करून गुन्हा दाखल करण्यात आला आहे. याशिवाय दोन हॉटेलमध्ये झालेल्या चोरीतील आरोपींना पकडून चोरीचा मुद्देमाल हस्तगत करण्यात आला आहे.
प्रादेशिक अधिकारी हनुमंत पाटील यांनी एमआयडीसी परिसरात योग्य जागा उपलब्ध करून देऊन पार्किंगचा प्रश्न सोडवण्यात येईल. सीसीटीव्ही बसवण्यासाठी आवश्यक त्या उपाययोजना केल्या जातील अशी ग्वाही दिली. तसेच उद्योजकांनीही आपल्या जबाबदाऱ्या वेळेवर पार पाडण्याचे आवाहन त्यांनी केले. परप्रांतीय मजुरांच्या नोंदी सर्व ठेकेदार आणि रूममालकांनी ठेवाव्यात, अशी सूचना करण्यात आली.
यावेळी बारामती इंडस्ट्रियल डेव्हलपमेंट असोसिएशनचे अध्यक्ष धनंजय जामदार, शरद सूर्यवंशी यांनी उद्योजकांना येणाऱ्या अडचणी संदर्भात सूचना मांडल्या. हरिश्चंद्र खाडे, मनोहर गावडे, शिवाजी निंबाळकर, संदीप जगताप, नारायण हेगडे, अमोल धायगुडे, अतुल काळे, एस. ए. गोळे, राकेश अवाक, अमित शर्मा, मुकेश चव्हाण, योगेश मगदूम, इमरान सलीम मोमीन, गणेश जडवे, सतीश कोकरे, हरीश कुंभरकर, एन बी कोठमिरे, सौरभ मोहिते, चंद्रकांत भाटकर, भरत जाधव, अशोक कुमार राव, अविनाश सावंत आदी उद्योजक उपस्थित होते.
