पुणे : न्यूज कट्टा
प्रशिक्षणार्थी आयएएस अधिकारी पूजा खेडकर हिची आई मनोरमा खेडकर हिला पुणे ग्रामीण पोलिसांच्या पथकाने महाड येथून अटक केली आहे. मुळशी तालुक्यातील शेतकऱ्यांना बंदुकीचा धाक दाखवत धमकावल्याप्रकरणी मनोरमा खेडकरवर गुन्हा दाखल आहे. मात्र गेले काही दिवस ती फरार होती. दरम्यान, आज पोलिसांनी तिला अटक करत न्यायालयात हजर केले असता तिला तीन दिवसांची पोलिस कोठडी सुनावण्यात आली आहे.
काही दिवसांपूर्वी मनोरमा खेडकर हिचा शेतकऱ्यांना बंदुकीचा धाक दाखवत धमकावल्याचा व्हिडिओ सोशल मिडियामध्ये व्हायरल झाला होता. या प्रकरणी पुणे ग्रामीण पोलिसांनी मनोरमा खेडकरसह तिच्या साथीदारांवर गुन्हा दाखल केला होता. मात्र गुन्हा दाखल होताच मनोरमा खेडकर फरार झाली होती. मात्र आज पुणे ग्रामीण पोलिसांच्या पथकाने तिला महाड येथील एका हॉटेलमधून अटक केली. अटकेनंतर मनोरमा खेडकर हिला पौड पोलिस ठाण्यात आणण्यात आले.
त्यानंतर सर्व प्रक्रिया पूर्ण करून तिची वैद्यकीय तपासणी करण्यात आली. तेथून तिला न्यायालयात हजर करण्यात आले. पोलिसांकडून मनोरमा खेडकरला सात दिवसांची पोलिस कोठडी द्यावी, अशी मागणी करण्यात आली होती. मात्र न्यायालयाने तिला तीन दिवसांची पोलिस कोठडी सुनावली आहे.
मनोरमा खेडकरच्या अडचणी वाढल्या..!
दरम्यान, मनोरमा खेडकरवर यापूर्वी केवळ शेतकऱ्यांना धमकावल्याचा गुन्हा दाखल होता. मात्र आता जीवे मारण्याचा प्रयत्न केल्याचे कलम वाढवण्यात आले आहे. त्यामुळे मनोरमा खेडकरच्या अडचणीत वाढ होण्याची शक्यता वर्तवली जात आहे.
