बारामती : न्यूज कट्टा
बारामतीमध्ये एमआयडीसीचे (BARAMATI MIDC) नवीन प्रादेशिक कार्यालय (Regional Office ) स्थापन करुन या परिसरातील हजारो उद्योजकांना पुण्याऐवजी स्थानिक पातळीवरच सेवासुविधा देण्याची मागणी बारामती इंडस्ट्रियल डेव्हलपमेंट असोसिएशनने उपमुख्यमंत्री अजित पवार (DCM AJIT PAWAR) यांच्याकडे केली होती. या मागणीला प्रतिसाद देत राज्य शासनाने बारामतीसह राज्यात सात ठिकाणी एमआयडीसीची प्रादेशिक कार्यालये स्थापन करण्याचे आदेश काढल्याची माहिती या असोसिएशनचे अध्यक्ष धनंजय जामदार यांनी दिली.
भूखंड मागणी अर्ज करणे, भूखंडाचे वाटप करून घेणे, भूखंडाचा ताबा घेणे, मुदतवाढ घेणे, भूखंड हस्तांतर करणे, विभाजन करणे, एकत्रीकरण करणे, बँक कर्जासाठी त्रिपक्षीय करार करणे, वारस नोंद करणे, नावात बदल करणे, उद्योग स्वरूपात बदल करणे अशा असंख्य कामांसाठी बारामती परिसरातील उद्योजकांना पुणे शहरात असलेल्या एमआयडीसीच्या प्रादेशिक कार्यालयात जावे लागत होते. या कार्यालयावर बारामतीसह हिंजवडी, हिंजवडी, चाकण, रांजणगाव, जेजुरी, इंदापूर, कुरकुंभ, पणदरे आदी औद्योगिक क्षेत्राची जबाबदारी होती. त्यामुळे या कार्यालयात उद्योजकांची कामे खोळंबत असल्याचे चित्र होते.
स्वतंत्र कार्यालय नसल्यामुळे वेळ व पैसा जाऊनही उद्योजकांना नाहक मनस्ताप सहन करावा लागत होता. या पार्श्वभूमीवर बारामती इंडस्ट्रियल डेव्हलपमेंट असोसिएशनचे अध्यक्ष धनंजय जामदार, उपाध्यक्ष मनोहर गावडे, सचिव अनंत अवचट, खजिनदार अंबीरशाह शेख, सदस्य महादेव गायकवाड, मनोज पोतेकर, हरिभाऊ थोपटे, संभाजी माने, चंद्रकांत नलवडे, हरीश कुंभारकर, हरिश्चंद्र खाडे, विष्णू दाभाडे, सूर्यकांत रेड्डी, राजन नायर, अभिजित शिंदे, सौ. चारुशीला धुमाळ, सौ. उज्ज्वला गोसावी, मॅनेजर माधव खांडेकर यांनी उपमुख्यमंत्री अजित पवार आणि उद्योगमंत्री उदय सामंत यांचेकडे बारामतीसाठी एमआयडीसीचे स्वतंत्र नवीन प्रादेशिक कार्यालय मंजुर करण्याची मागणी केली होती.
या मागणीबाबत वेळोवेळी पाठपुरावाही करण्यात आला होता. अखेर या मागणीला यश मिळाले असून लवकरच बारामतीत एमआयडीसीचे नवीन प्रादेशिक कार्यालय कार्यान्वित होणार आहे. त्यामुळे बारामतीसह परिसरातील उद्योजकांना मोठा दिलासा मिळाला आहे. बारामतीसह राज्यातील सात ठिकाणी एमआयडीसीच्या नवीन प्रादेशिक कार्यालयांना मंजूरी देण्यात आली आहे. दरम्यान, या निर्णयाबद्दल बारामतीतील उद्योजकांनी अजितदादांचे आभार मानले आहेत.
