कुरकुंभ : न्यूज कट्टा
एका पाच वर्षांच्या मुलीचं अपहरण करून तिच्यावर अत्याचार केल्याच्या धक्कादायक प्रकार दौंड तालुक्यातील मळद परिसरात घडला आहे. मुलीच्या ओरडण्याचा आवाज आल्यानंतर ग्रामस्थांनी संबंधित नराधमाला पकडल्यामुळे मोठा अनर्थ टळला आहे. दरम्यान, ग्रामस्थांनी संबंधित आरोपीला बेदम चोप देत पोलिसांच्या ताब्यात दिले. या प्रकरणी दौंड पोलिस ठाण्यात गुन्हा दाखल करण्यात आला आहे.
नवनाथ चंद्रकांत रिठे (वय २७, रा. शेरेचीवाडी, ता. फलटण) असं या आरोपीचं नाव आहे. याबाबत मिळालेली माहिती अशी की, आरोपीने पुणे सोलापूर महामार्गावरील भागवतवस्ती येथील एका किराणा दुकानासमोरून पाच वर्षांच्या मुलीचं अपहरण केलं. त्यानंतर तिला मळद येथील एका शेतात नेऊन बळजबरीने तिच्या अंगावरील कपडे काढून मारहाण करत लैंगिक अत्याचाराचा प्रयत्न केला. या सर्व प्रकाराला संबंधित मुलीने विरोध करत आरडाओरडा केला.
मुलीच्या ओरडण्याचा आवाज ऐकून स्थानिकांनी तात्काळ उसाच्या शेताकडे धाव घेतली. त्यावेळी हा प्रकार उघडकीस आला. ग्रामस्थांनी वेळीच धाव घेतल्यामुळे मोठा अनर्थ टळला. या घटनेनंतर ग्रामस्थांनी संबंधित आरोपीला बेदम चोप देत पोलिसांच्या ताब्यात दिले.
या प्रकरणी दौंड पोलिस ठाण्यात भारतीय न्याय संहिता कलम ६५(२), १३७ (२), ११५(२), बाल लैंगिक अत्याचार विरोधी कायदा कलम ४, ६, ८,१०, १२ नुसार गुन्हा दाखल करण्यात आला आहे. आरोपी नवनाथ रिठे याला अटक करण्यात आली असून पुढील तपास पोलिस उपनिरीक्षक मीरा मटाले या करीत आहेत.
