बारामती : न्यूज कट्टा
माळेगाव सहकारी साखर कारखाना निवडणुकीत उपमुख्यमंत्री अजित पवार यांच्या नेतृत्वाखालील निळकंठेश्वर पॅनलचीच सत्ता येणार यावर शिक्कामोर्तब होत आहे. दुसऱ्या फेरीतील मतमोजणीत पणदरे गटातही निळकंठेश्वर पॅनलचा करिश्मा पहायाला मिळाला असून येथील तीनही उमेदवार मोठ्या फरकाने विजयी झाले आहेत. दरम्यान, निळकंठेश्वर पॅनलच्या विजयी उमेदवारांची संख्या आता बारा झाली असून या सत्तेसाठीचं बहुमत या पॅनलला मिळालं आहे.
माळेगाव सहकारी साखर कारखान्याची काल सकाळपासून मतमोजणी सुरू आहे. यामध्ये काल रात्री उशीरापर्यंत पहिल्या फेरीतील मतांची मोजणी करण्यात आली. त्यानंतर आज सकाळी दुसऱ्या फेरीतील मतमोजणी सुरू करण्यात आली. दुपारपर्यंत एकूण नऊ जागांचे निकाल समोर आले होते. त्यानंतर पणदरे गटातही निळकंठेश्वर पॅनलचीच हवा असल्याचं पाहायला मिळालं.
पणदरे गटातून योगेश जगताप, तानाजी कोकरे आणि स्वप्नील जगताप यांनी मोठ्या फरकाने विजय मिळवला आहे. त्यामुळे आता विजयी उमेदवारांची संख्या बारावर पोहोचली आहे. त्यामुळे माळेगाव कारखान्यावरील निळकंठेश्वर पॅनलचे वर्चस्व स्पष्ट झाले आहे. दरम्यान, ब वर्गातून उपमुख्यमंत्री अजित पवार, अनुसूचित जाती जमाती प्रवर्गातून रतनकुमार भोसले, इतर मागास प्रवर्गातून नितीन शेंडे, भटक्या विमुक्त जाती-जमाती प्रवर्गातून विलास देवकाते, महिला राखीव प्रवर्गातून संगीता कोकरे, ज्योती मूलमुले, माळेगाव गटातून बाळासाहेब तावरे, शिवराज जाधवराव आणि राजेंद्र बुरुंगले अशा नऊ उमेदवारांचा विजय झाला आहे.
