बारामती : न्यूज कट्टा
माळेगाव सहकारी साखर कारखाना निवडणुकीत उपमुख्यमंत्री अजित पवार यांच्या नेतृत्वाखालील निळकंठेश्वर पॅनलने जोरदार मुसंडी मारली आहे. दुसऱ्या फेरीच्या मतमोजणीनंतर या पॅनलचे सहा उमेदवार निवडून आले आहेत. त्यानंतर आता माळेगाव गटातही निळकंठेश्वर पॅनलचे तीनही उमेदवार निवडून आले आहेत. त्यामुळे सहकार पॅनलच्या विजयी उमेदवारांची संख्या नऊवर गेली आहे. तर सहकार बचाव शेतकरी पॅनलचे प्रमुख रंजनकुमार तावरे यांचा पराभव झाला आहे.
माळेगाव सहकारी साखर कारखान्याची मतमोजणी काल दि. २४ जूनपासून बारामती येथील प्रशासकीय भवनात सुरू आहे. रात्री उशीरापर्यंत मतमोजणीची पहिली फेरी पार पडली असून त्यामध्ये अजितदादांच्या नेतृत्वाखालील निळकंठेश्वर पॅनलने आघाडी घेतली आहे. आज सकाळी दुसऱ्या फेरीला सुरुवात झाल्यानंतर आतापर्यंत नऊ जागांचे निकाल हाती आले आहेत. त्यामध्ये सर्व जागा निळकंठेश्वर पॅनलने जिंकल्या आहेत.
माळेगाव गटाच्या मोजणीकडे सर्वांचे लक्ष लागले होते. यामध्ये माळेगाव कारखान्याचे माजी अध्यक्ष बाळासाहेब तावरे, शिवराज जाधवराव आणि राजेंद्र बुरुंगले यांचा विजय झाला आहे. तर माळेगाव कारखान्याचे माजी अध्यक्ष आणि सहकार बचाव पॅनलचे प्रमुख रंजनकुमार तावरे यांचा या लढतीत धक्कादायक पराभव झाला आहे. दरम्यान, सकाळी अनुसूचित जाती जमाती प्रवर्गातून रतनकुमार भोसले, इतर मागास प्रवर्गातून नितीन शेंडे, भटक्या विमुक्त जाती-जमाती प्रवर्गातून विलास देवकाते आणि महिला राखीव प्रवर्गातून संगीता कोकरे आणि ज्योती मूलमुले यांचा विजय झाला आहे.
