माळेगाव सहकारी साखर कारखाना निवडणुकीत उपमुख्यमंत्री अजित पवार यांचा ब वर्गातून विजय झाला होता. त्यानंतर आज सकाळपासून दुसऱ्या फेरीला सुरुवात झाली असून एक एक निकाल समोर येवू लागले आहेत. दुसऱ्या फेरीनंतर पाच जागांचे निकाल जाहीर झाले आहेत. त्यामध्ये निळकंठेश्वर पॅनलने बाजी मारली असून आतापर्यंत या पॅनलच्या सहा उमेदवारांचा विजय झाला आहे.
माळेगाव सहकारी साखर कारखान्याची मतमोजणी काल दि. २४ जूनपासून बारामती येथील प्रशासकीय भवनात सुरू आहे. रात्री उशीरापर्यंत मतमोजणीची पहिली फेरी पार पडली असून त्यामध्ये अजितदादांच्या नेतृत्वाखालील निळकंठेश्वर पॅनलने आघाडी घेतली आहे. दरम्यान, काल ब वर्ग मतदारसंघाचा पहिला निकाल जाहीर करण्यात आला होता, त्यामध्ये उपमुख्यमंत्री अजित पवार यांनी ९१ मते मिळवत विजय मिळवला आहे.
त्यानंतर आज सकाळी दुसऱ्या फेरीची मतमोजणी सुरू झाली आहे. त्यामध्ये अनुसूचित जाती जमाती प्रवर्गातून रतनकुमार भोसले, इतर मागास प्रवर्गातून नितीन शेंडे, भटक्या विमुक्त जाती-जमाती प्रवर्गातून विलास देवकाते आणि महिला राखीव प्रवर्गातून संगीता कोकरे आणि ज्योती मूलमुले यांचा विजय झाला आहे.
