पुणे : न्यूज कट्टा
पुण्यातील कोंढवा परिसरात काल गणेश काळे याची हत्या टोळीयुद्धातूनच झाल्याचे आता समोर आले आहे. आंदेकर टोळीकडून ही हत्या घडवण्यात आली असून या प्रकरणात आतापर्यंत नऊ आरोपी निष्पन्न झाले आहेत. तर पोलिसांनी आतापर्यंत दोन अल्पवयीन बालकांसह पाचजणांना अटक केली आहे. तसेच या हत्या प्रकरणात आता तुरुंगात असलेल्या बंडू आंदेकरवरही गुन्हा दाखल करण्यात आला आहे.
गणेश किसन काळे या रिक्षाचालक तरुणाची काल कोंढवा येथील खडी मशीन चौकात दोन दुचाकीवरून आलेल्या चौघांनी गोळ्या झाडून आणि कोयत्याने वार करत हत्या केली होती. या घटनेनंतर पुण्यात एकच खळबळ उडाली होती. संपूर्ण कुटुंब तुरुंगात असतानाही आंदेकर टोळीकडून ही हत्या घडवण्यात आली. विशेष म्हणजे, रात्रीच पोलिसांनी या प्रकरणातील आरोपींना अटक केली आहे. अमन महेबूब शेख, अरबाज अहमद पटेल, मयूर वाघमारे आणि दोन अल्पवयीन अशा पाचजणांना पोलिसांनी अटक केली आहे.
१ सप्टेंबर २०२४ रोजी माजी नगरसेवक वनराज आंदेकर याची हत्या झाली होती. त्यावेळी आंदेकर टोळीने या हत्येचा बदला घेण्याची शपथ घेतली होती. त्यानुसार ही टोळी प्लॅनिंग करत असताना पोलिसांना याची माहिती मिळाली होती. त्यामुळे मागील दोन महिन्यांपूर्वी या टोळीचा कट फसला होता. मात्र त्यानंतर काहीच दिवसात म्हणजेच दि. ५ सप्टेंबर २०२५ रोजी आंदेकर टोळीने आयुष कोमकर याची हत्या केली. या प्रकरणात संपूर्ण आंदेकर कुटुंब तुरुंगात आहे.
याचदरम्यान, काल दि. १ नोव्हेंबर रोजी दुपारी कोंढवा येथील खडी मिशन चौकात गणेश किसन काळे याच्यावर गोळीबार करत, तसेच कोयत्याने वार करत हत्या करण्यात आली. गणेश काळे हा वनराज आंदेकर हत्येप्रकरणी तुरुंगात असलेल्या समीर काळे याचा भाऊ आहे. समीर काळे याने वनराज आंदेकर हत्या प्रकरणात प्रत्यक्ष सहभागी होत आरोपींना हत्यारे पुरवल्याचे पोलिस तपासात निष्पन्न झाले होते. त्यामुळे गणेशची हत्या ही टोळीयुद्धातून आणि बदला घेण्याच्या हेतूनेच झाल्याचे पोलिस तपासात समोर आले आहे.
या प्रकरणी कृष्णा आंदेकर (वय २८), बंडू आंदेकर (वय ६९), स्वराज वाडेकर (वय २५, तिघे रा. डोके तालीम चौक, नाना पेठ), अमीर खान (वय २५), मयूर वाघमारे (वय २३), अमन मेहबुब शेख (वय २३, रा. काकडे वस्ती, कोंढवा), अरबाज अहमद पटेल (वय २४, रा. काकडे वस्ती, कोंढवा) यांच्यासह दोन अल्पवयीन आरोपींवर गुन्हा दाखल करण्यात आला आहे. या प्रकरणी गणेशचे वडील किसन काळे (रा. येवलेवाडी, पुणे) यांनी फिर्याद दिली आहे.
