पुणे : न्यूज कट्टा
आपल्या वादग्रस्त वागणुकीमुळे आणि शाही थाटामुळे चर्चेत आलेल्या प्रशिक्षणार्थी अधिकारी पूजा खेडकरसह त्यांच्या कुटुंबियांसमोरील अडचणी वाढताना दिसत आहेत. पूजाच्या आई मनोरमा खेडकर यांचा शेतकऱ्यांना धमकावतानाचा व्हिडिओ व्हायरल झाल्यानंतर पोलिसांनी या प्रकरणाची गंभीर दखल घेतली आहे. त्यानुसार पूजा खेडकरच्या आई मनोरमा, वडील दिलीप खेडकर यांच्यासह अन्य काहीजणांवर पौड पोलिस ठाण्यात गुन्हा दाखल करण्यात आला आहे.
मागील काही दिवसांपासून प्रशिक्षणार्थी आयएएस अधिकारी पूजा खेडकर या आपल्या थाटामुळे चर्चेत आल्या आहेत. स्वतंत्र वाहनासह निवास व्यवस्था आणि कार्यालयात स्वतंत्र कक्षासाठी वरिष्ठ अधिकाऱ्यांना धारेवर धरणाऱ्या पूजाचे अनेक उद्योग आता समोर येत आहेत. पुजा खेडकरचे वडील दिलीप खेडकर यांनी शासन सेवेत असताना कोट्यवधी रुपयांची संपत्ती कमावल्याची बाब आता समोर आली आहे. खेडकर यांनी अनेक ठिकाणी जमीनी बळकावल्या असल्याचं बोललं जात आहे.
दरम्यान, मुळशी तालुक्यात खेडकर यांनी २५ एकर जमीन खरेदी केली. त्यानंतर त्यांनी शेजारील शेतकऱ्यांच्या जमिनीवरही अतिक्रमण केल्याचा धक्कादायक प्रकार समोर आहे. विरोध करणाऱ्या शेतकऱ्यांना मनोरमा खेडकर यांनी बंदुकीचा धाक दाखवत दमदाटी केल्याचा व्हिडिओही आता व्हायरल होत आहे. याचीच आता पुणे ग्रामीण पोलिसांनी गंभीर दखल घेतली जमिनीच्या वादातून शेतकऱ्यांना धमकावणे, मारहाण, शिवीगाळ , जीवे मारण्याची धमकी, पिस्तूल रोखणे अशा आरोपांखाली पूजाची आई मनोरमा आणि वडील दिलीप खेडकर यांच्यासह एकूण पाचजणांवर गुन्हा दाखल करण्यात आला आहे.
पौड पोलिस ठाण्यात शेतकरी पंढरीनाथ कोंडीबा पासलकर यांच्या फिर्यादीवरून गुन्हा दाखल करण्यात आला आहे. यामध्ये पूजाची आई मनोरमा, वडील दिलीप खेडकर यांच्यासह अन्य आरोपींवर हा गुन्हा दाखल करण्यात आला आहे. दरम्यान, याबाबत संबंधित शेतकऱ्यांनी पोलिसांकडे दाद मागितली होती. मात्र वरिष्ठांच्या दबावामुळे या प्रकरणी पोलिसांकडून फिर्याद दाखल करण्यात आली नव्हती. मात्र हा व्हिडिओ व्हायरल झाल्यानंतर पोलिसांकडून तात्काळ गुन्हा दाखल करण्यात आला आहे.
