बारामती : न्यूज कट्टा
उपमुख्यमंत्री अजित पवार यांच्या वाढदिवसानिमित्त बारामती तालुका कुस्तीगीर संघाच्या माध्यमातून आणि युवा नेते जय पवार यांच्या पुढाकारातून उद्या रविवार दि. २८ जुलै रोजी बारामती शहरातील शारदा प्रांगणात निकाली कुस्त्यांच्या मैदानाचं आयोजन करण्यात आलं आहे. या मैदानात अनेक नामवंत मल्ल हजेरी लावणार असून कृषिमंत्री धनंजय मुंडे, क्रीडामंत्री संजय बनसोडे हेही उपस्थित राहणार आहेत.
उपमुख्यमंत्री अजित पवार यांनी नेहमीच कुस्तीगीर आणि कुस्तीबद्दल आपुलकी बाळगली आहे. या पार्श्वभूमीवर त्यांच्या वाढदिवसांचं औचित्य साधत हे मैदान आयोजित करण्यात आलं आहे. बारामती शहरातील शारदा प्रांगण येथे उद्या दुपारी १ वाजता हे कुस्तीचे मैदान सुरू होणार आहे. या मैदानास कृषिमंत्री धनंजय मुंडे, क्रीडामंत्री संजय बनसोडे, खासदार सुनेत्राताई पवार, आमदार सुनीलअण्णा शेळके, आमदार दत्तात्रय मामा भरणे उपस्थित राहणार आहेत.
या मैदानात १०० पेक्षा अधिक कुस्त्या होणार आहेत. त्यामध्ये पहिल्या क्रमांकाची कुस्ती महाराष्ट्र केसरी हर्षवर्धन सदगीर विरुद्ध उपमहाराष्ट्र केसरी माउली कोकाटे यांची होणार आहे. दुसऱ्या क्रमांकाची कुस्ती महान भारत केसरी माऊली जमदाडे विरुद्ध महाराष्ट्र केसरी बालारफीक शेख यांची होणार आहे. तिसऱ्या क्रमांकाची कुस्ती महाराष्ट्र केसरी पृथ्वीराज पाटील विरुद्ध गणेश जगताप यांची होणार आहे. चौथ्या क्रमांकाची कुस्ती मुंबई महापौर केसरी भारत मदने विरुद्ध उपमहाराष्ट्र केसरी योगेश जगताप यांची होणार आहे.
आंतरराष्ट्रीय कुस्तीपटू बजरंग पुनिया, गिता फोगट, ट्रिपल महाराष्ट्र केसरी नरसिंग यादव, ट्रिपल महाराष्ट्र केसरी विजय चौधरी, महाराष्ट्र केसरी सिंकदर शेख आदी कुस्ती क्षेत्रातील मान्यवरांची या मैदानात विशेष उपस्थिती असणार आहे. तसेच या कुस्ती मैदानात राष्ट्रीय कुस्तीपटू सोनाली मंडलिक विरुद्ध अमृता पुजारी यांच्यातही लढत होणार आहे. तसेच महाराष्ट्र केसरी, उपमहाराष्ट्र केसरी, महाराष्ट्र विजेते मल्ल या मैदानात उपस्थित राहणार आहेत. या मैदानात कुस्ती शौकिनांनी मोठ्या संख्येनं उपस्थित राहण्याचं आवाहन आयोजकांच्या वतीने करण्यात आलं आहे.
दरम्यान, आज सायंकाळी युवा नेते जय पवार यांनी या मैदानाची पाहणी करत पूजन केले. तसेच पत्रकारांशीही संवाद साधला. यावेळी शिवाजीराव काळे, जंगल वाघ, दिलीप काटे, संतोष टाटीया, सुधाकर माने, पोपटराव गावडे, उत्कर्ष काळे, महेश देवकाते, धैर्यशील काळे, ऋषी गावडे, अमोल पवार, निलेश जगदाळे, गितेश पलंगे, ओम टाटीया आदी बारामती तालुका कुस्तीगीर संघाचे पदाधिकारी व सदस्य उपस्थित होते.
