पुणे : न्यूज कट्टा
भाजपचे आमदार योगेश टिळेकर यांचे मामा उद्योजक सतीश वाघ यांच्या हत्येची त्यांच्या पत्नी मोहिनी वाघ हिनेच सुपारी दिल्याचं समोर आलं आहे. आपल्या मुलाच्या मित्राशी सुरू असलेल्या प्रेम प्रकरणावरुन पतीशी सातत्यानं वाद होत असल्यानं मोहिनी वाघ हिने सुपारी देऊन ही हत्या घडवून आणल्याचा खळबळजनक प्रकार समोर आला आहे. पतीच्या हत्येनंतर धाय मोकलून रडणारी पत्नीच या हत्येची सूत्रधार असल्याचं स्पष्ट झाल्यामुळं खळबळ उडाली आहे.
उद्योजक असलेले सतीश वाघ हे दि. ९ डिसेंबर रोजी पहाटेच्या वेळी नेहमीप्रमाणे मॉर्निंग वॉकसाठी गेले होते. त्यावेळी ब्ल्यू बेरी हॉटेलजवळ चारचाकीतून आलेल्या चौघांनी त्यांचं अपहरण केलं होतं. दरम्यान, ९ डिसेंबर रोजी रात्रीच सतीश वाघ यांचा मृतदेह मिळून आला होता. त्यामध्ये वाघ यांच्यावर ७२ वेळा वार करत त्यांची निर्घृणपणे हत्या केल्याचं समोर आलं होतं. तसेच सतीश वाघ यांचे गुप्तांगही कापण्यात आलं होतं.
या प्रकरणात पोलिसांनी चार जणांना अटकही केली. पाचवा आरोपी आतिश जाधव याला पोलिसांनी धाराशीवमधून अटक केली. या अटकेनंतर सतीश वाघ यांच्या घराशेजारी राहणारा अक्षय जवळकर आणि पत्नी मोहिनी वाघ यांनीच हा हत्येचा कट रचल्याचं समोर आलं आहे. दरम्यान, अक्षय जवळकर आणि मोहिनी वाघ यांचे प्रेमसंबध होते. या प्रेम प्रकरणाची सतीश वाघ यांना कुणकुण लागली होती. त्यातून वाघ दांपत्यांमध्ये सतत वाद होत होते.
पतीकडून प्रेमात अडथळा येत असल्यानं मोहिनी वाघ हिने आपला प्रियकर अक्षय जवळकर याला हाताशी धरत सतीश वाघ यांच्या हत्येचा कट रचला. त्यासाठी दीड लाख रुपये देण्यात आले होते. तसेच उर्वरीत साडेतीन लाख रुपये घटनेनंतर देण्याचं ठरलं होतं. दरम्यानच्या काळात सतीश वाघ यांच्या हत्येच्या काही दिवस आधीपासून कट रचला जात होता. त्यांची हत्या काशी करायची याबाबत फूल प्लॅन अक्षय आणि मोहिनी करत होते, ही बाबही तपासात समोर आली आहे.
