पुणे : न्यूज कट्टा
पत्नी, सासू आणि मेहुणीच्या छळाला कंटाळलेल्या पतीने गळफास घेत आत्महत्या केल्याची घटना पुण्यातील विश्रांतवाडी परिसरात घडली आहे. आत्महत्येपूर्वी या तरुणाने लिहिलेल्या चिठ्ठीत पत्नी आणि तिच्या कुटुंबियांच्या त्रासाबद्दल माहिती दिली आहे. त्यानुसार विश्रांतवाडी पोलिसांनी पत्नी, सासू आणि मेहुणीविरोधात गुन्हा दाखल केला आहे.
प्रफुल्ल हरिश्चंद्र कदम (वय ३२, रा. सत्यम राजा योग सोसायटी, धानोरी, विश्रांतवाडी) असे आत्महत्या केलेल्या तरुणाचे नाव आहे. या संदर्भात त्यांचे वडील हरिश्चंद्र गोविंद कदम यांनी विश्रांतवाडी पोलीस ठाण्यात फिर्याद दिली आहे. याबाबत पोलिसांकडून मिळालेली माहिती अशी की, ‘तुम्ही आम्हाला फसवले आहे. तू मेला तर मी दुसरा विवाह करुन सुखी राहिल’ असं त्याची पत्नी म्हणत असे. त्यातूनच पत्नीसह सासू आणि मेहुणीने प्रफुल्ल यांना त्रास देण्यास सुरुवात केली होती.
सततच्या या त्रासामुळे प्रफुल्ल कदम यांनी धानोरी येथील राहत्या घरी गळफास घेऊन आत्महत्या केली. आत्महत्येपूर्वी त्यांनी चिठ्ठी लिहीत पत्नी, सासू, मेहुणीच्या त्रासामुळे आत्महत्या करत असल्याचे नमूद केले आहे. त्यानुसार विश्रांतवाडी पोलिसांनी पत्नी, सासू आणि मेहुणीवर आत्महत्येस प्रवृत्त केल्याप्रकरणी गुन्हा दाखल केला आहे. अधिक तपास पोलीस उपनिरीक्षक पद्मराज गंपले करत आहेत.
