बारामती : न्यूज कट्टा
दारू देत नसल्याच्या रागातून हॉटेलमध्ये घुसून हॉटेल मॅनेजर व कामगारावर चाकूनं हल्ला केल्याची घटना बारामती तालुक्यातील कऱ्हावागज येथे घडली आहे. आमच्या गावात हॉटेल चालवतो आणि आम्हालाच नडतोय, आता तुला सोडणार नाही असं म्हणत या तिघांनी हा हल्ला केला. या प्रकरणी माळेगाव पोलिस ठाण्यात गुन्हा दाखल करण्यात आला असून या तिघांना ताब्यात घेण्यात आले आहे.
विशाल बाबा मोरे, संदेश उर्फ आबा अनिल शिंदे (दोघेही रा. कऱ्हावागज, ता. बारामती) आणि निखिल अशोक खरात (रा. आमराई, बारामती, ता. बारामती) या तिघांवर गुन्हा दाखल करण्यात आला आहे. हॉटेल मॅनेजर ऋषिकेश भाऊसाहेब मिंड (मूळ रा. कडा, ता.,आष्टी, जि. बीड) व दिनेश वर्मा (मूळ रा. उत्तर प्रदेश) यांच्यावर हा हल्ला झाला आहे.
याबाबत मिळालेली माहिती अशी की, मकर संक्रांतीच्या पहाटे पावणेदोन वाजता कऱ्हावागज येथील हॉटेल शारदा बार अँड लॉजिंग येथील मॅनेजर आणि कर्मचारी हॉटेल बंद करून झोपण्यासाठी गेले होते. त्यावेळी गावातील विशाल मोरे, संदेश शिंदे आणि निखिल खरात हे तिघे हॉटेलमध्ये आले. त्यांनी हॉटेलच्या रूममध्ये घुसून शिवीगाळ करत आम्हाला दारू देत नाहीस का? आमच्याच गावात हॉटेल चालवून आम्हालाच नडतो काय? आता तुला सोडत नाही, आता आम्हाला नड, असे बोलन भाऊसाहेब मिंड याला मारहाण करून खाली पाडले.
त्याचवेळी निखिल खरात याने त्याच्याकडे असलेल्या धारदार चाकूने मिंड यांच्यावर हल्ला केला. तर हा वाद सोडवण्यासाठी आलेल्या हॉटेलमधील कामगार दिनेश वर्मा याच्या पोटात चाकू खुपसला. इतर कामगारांवरही हल्ल्याचा प्रयत्न केला. त्यानंतर हे तिघेही चारचाकी वाहनातून निघून गेले. या घटनेची माहिती मिळताच सहाय्यक पोलिस निरीक्षक सचिन लोखंडे यांनी पोलिस उपनिरीक्षक देविदास साळवे यांना सूचना देत आरोपींच्या शोधासाठी पाठवले. पहाटेच्या वेळी या तिघांनाही हडपसर येथील गाडीतळ परिसरातून ताब्यात घेण्यात आले.
पोलीस अधीक्षक पंकज देशमुख, अप्पर पोलीस अधीक्षक गणेश बिरादार, उपविभागीय पोलीस अधिकारी सुदर्शन राठोड, स्थानिक गुन्हे शाखेचे पोलीस निरीक्षक अविनाश शिळीमकर यांच्या मार्गदर्शनाखाली सहाय्यक पोलीस निरीक्षक सचिन लोखंडे, पोलिस उपनिरीक्षक अमोल खटावकर, देविदास साळवे, पोलीस अंमलदार राहुल पांढरे, विजय वाघमोडे, ज्ञानेश्वर मोरे, नंदकुमार गव्हाणे, अमोल राऊत, सागर पवार, जयसिंग कचरे, अमोल कोकरे यांनी ही कारवाई केली.
