बारामती : न्यूज कट्टा
माळेगाव सहकारी साखर कारखान्याच्या मतमोजणीला सुरुवात झाली आहे. ब वर्गातून उपमुख्यमंत्री अजित पवार यांचा विजय झाला असून आता अन्य गटांची मोजणी सुरू करण्यात आली आहे. त्यामध्ये अनुसूचित जाती-जमाती प्रवर्गातून निळकंठेश्वर पॅनलच्या रतनकुमार भोसले यांनी आघाडी घेतल्याची माहिती पुढे येत आहे.
माळेगाव सहकारी साखर कारखान्याच्या निवडणुकीसाठी रविवार दि. २२ जून रोजी मतदान प्रक्रिया पार पडली. या निवडणुकीत १७२९६ सभासदांनी मतदानाचा हक्क बजावला होता. आज सकाळी बारामती येथील प्रशासकीय भवनामध्ये मतमोजणीला सुरुवात करण्यात आली. त्यामध्ये सर्वात आधी ब वर्गाची मोजणी करण्यात आली. ब वर्गातून स्वत: अजितदादांनी आपला अर्ज दाखल केला होता. त्यामध्ये १०१ पैकी ९१ मते मिळवत अजितदादांनी विजय मिळवला आहे.
३४ टेबलवर दोन फेऱ्यांमध्ये ही मतमोजणी पार पडणार आहे. सध्या अनुसूचित जाती जमाती प्रवर्गाची मोजणी सुरू असून त्यामध्ये निळकंठेश्वर पॅनलचे उमेदवार रतनकुमार भोसले हे आघाडीवर असल्याची माहिती मिळत आहे. दरम्यान, प्राथमिक कल येण्यासाठी आणखी काही काळ वाट पहावी लागेल, असंच सध्याचं चित्र आहे.
