माळेगाव : न्यूज कट्टा
संपूर्ण राज्याचं लक्ष वेधलेल्या माळेगाव सहकारी साखर कारखान्याच्या निवडणुकीत अजितदादांच्या नेतृत्वाखालील निळकंठेश्वर पॅनलने सरशी मारली. त्यानंतर आज कारखान्याच्या अध्यक्ष आणि उपाध्यक्षपदाची निवड करण्यात आली. त्यामध्ये अध्यक्षपदी उपमुख्यमंत्री अजित पवार यांची निवड झाली असून उपाध्यक्षपदी संगीता कोकरे यांना संधी देण्यात आली आहे. माळेगाव कारखान्याच्या निवडणुकीपूर्वीच अजितदादांनी अध्यक्षपद आपण स्वत:कडेच घेणार असल्याचं जाहीर केलं होतं.
माळेगाव सहकारी साखर कारखान्याच्या निवडणुकीत अजितदादांच्या नेतृत्वाखालील निळकंठेश्वर पॅनल आणि ज्येष्ठ नेते चंद्रराव तावरे व रंजन तावरे यांच्या नेतृत्वातील सहकार बचाव शेतकरी पॅनलमध्ये लढत झाली. या निवडणुकीमध्ये निळकंठेश्वर पॅनलने २१ पैकी २० जागांवर विजय मिळवत कारखान्याची सत्ता अबाधित ठेवली. तर विरोधी पॅनलमधून केवळ चंद्रराव तावरे यांचा विजय झाला. माळेगाव कारखान्याच्या प्रचाराचा शुभारंभ करतानाच अजितदादांनी आपण स्वत: कारखान्याचे अध्यक्ष होणार असल्याचं जाहीर केलं होतं. त्या अनुषंगाने त्यांनी या निवडणुकीत अत्यंत बारकाईने लक्ष देत व्यूहरचना आखली आणि कारखान्यावरील सत्ता कायम राखली.
आज माळेगाव कारखान्यावरील यशवंतराव चव्हाण सभागृहात अध्यक्ष आणि उपाध्यक्ष निवडीची बैठक घेण्यात आली. त्यामध्ये अध्यक्षपदासाठी अजितदादांचा, तर उपाध्यक्षपदासाठी संगीता बाळासाहेब कोकरे यांचा अर्ज दाखल करण्यात आला. दोन्ही पदांसाठी एकेकच अर्ज आल्यामुळे ही निवड बिनविरोध झाल्याचे निवडणूक निर्णय अधिकारी यशवंत माने यांनी जाहीर केले. दरम्यान, अजितदादांची माळेगाव कारखान्याच्या अध्यक्षपदी निवड होताच कार्यकर्त्यांकडून एकच जल्लोष करण्यात आला.
अजितदादांनी आपल्या राजकीय कारकीर्दीची सुरुवात छत्रपती सहकारी साखर कारखान्याच्या संचालकपदापासून केली होती. त्यानंतर सातत्याने त्यांचा राज्य मंत्रीमंडळात सहभाग राहीला आहे. माळेगाव कारखान्याची धूराही आता अजितदादांनी स्वत:कडे घेतली असून पुढील पाच वर्षात कारखान्याचा चेहरामोहरा बदलून दाखवण्याचा निर्धारही त्यांनी बोलून दाखवला आहे.
